Општина Македонска Каменица интензивно се подготвува за најголемата културна манифестација во Источна Македонија, “Каменичко Културно Лето”. Годинава, манифестацијата ќе трае пет дена, од 25-ти до 29-ти август и ќе се оддржува на Градскиот плоштад во Македонска Каменица. Низа културни настани се дел од програмата која е во финална фаза на подготовка. Покрај концерт на класична музика, настапи на познати фолклорни ансамбли од Македонија, Бугарија и Србија, потврдени се и настапите на неколку популарни македонски и балкански изведувачи и бендови. Концерт во Македонска Каменица ќе има деветчлениот српски состав МВП, кои со нивните мегапопуларни хитови “Целу ноч и цели дан”, “Идемо горе”, “Волим кад те волим”… ветуваат добра забава и вистинско доживување за публиката.
На централната вечер, на 28-ми август – Денот на Општината и денот на рударите ќе настапи феноменалниот Жељко Јоксимовиќ. И повеќе од сигурно е дека неговите хитови ќе придонесат за едно незаборавно искуство, позитивна и разиграна енергија и исклучителна забава. Рударска Македонска Каменица е подготвена да пречека повеќе од 30 000 гости и се надева дека ова, шесто издание на Каменичко Културно Лето ќе ги урне сите досегашни рекорди по број на посетители.
Манифестацијата е во организација на Општина Македонска Каменица и Културно-информативниот центар “Романса”, а генерален покровител е Рудникот “Саса”. Дел од настаните се поддржани и од Министерството за култура на Република Македонија. Специјализираниот македонски музички портал Музика24 оваа година е еден од медиумските покровители на овој голем музичко-забавен настан.
Подготви: Редакција Музика24