Во пресрет на јубилејното 10-то по ред издание на фестивалот “Love and happiness” закажан на 22-ри јули, а кој традиционално се одржува на плажата Градиште во Охрид, ви најавуваме дека годинава ве очекува вистинска журка за паметење. Организаторите најавуваат журка на сите три плажи и маратонска забава со многу изненадувања, неколку светски и домашни диџеј имиња.
Електрик Јуниверз, Том Боксер и Морена, како и германскиот диџеј и продуцент Том Крафт се гостите кои ќе бидат задолжени за атмосферата на 22-ри јули на Градиште, а домашна поддршка на настанот со своите сетови ќе дадат Бушава азбука, Ранчез, Навигатор, Дејан Доги и Сателит. Фестивалот ќе се случува на сите три плажи, односно Градиште 1, 2 и 3, а освен одлична музика за посетителите се предвидени и пена забава, огномет… Забавите на сите три плажи почнуваат во 21 часот, а билетите во претпродажба се продаваат по цена од 400 денари. На врата на денот на фестивалот влезниците ќе чинат 600 денари, а во претпродажба може да се набават преку мрежата на купикартизасе, станица Стража, плажата Градиште, Острово – Свети Наум и ланџ бар Ноа во Охрид.
Една недела подоцна, односно веќе на 29-ти јули на истата локација е закажан спектакуларниот концерт на една од најголемите фолк ѕвезди на просторите на поранешна Југославија – Лепа Брена. Концертот ќе се одржи на плажа 2, па заради ограничениот капацитет бројот на влезници е ограничен. Во претпродажба билетите се продаваат по промотивна цена од 600 денари. Стартот на концертот е во 21 часот. На 5-ти август, пак, гостуваат Фрајле четиричлениот женски акустичен бенд од Нови Сад. Влезниците за дружбата со шармантните Фрајле чинат 500 денари.
Подготви: Редакција Музика24