Македонската филхармонија со два големи големи концерти на отворено

И годинава, следејќи ја традицијата, на крајот од сезоната Филхармонија излегува надвор од институцијата, надвор од стандардната концертна практика. На 23-ти и на 29-ти јуни, Филхармонија ќе реализира два концерти под заеднички наслов “Филхармонија на отворено” во Градскиот парк со почеток во 21 часот, а во соработка со Младинскиот културен центар и Град Скопје.

Првиот концерт ќе се одржи на 23-ти јуни (недела) и носи наслов “Ну Погоди”. Станува збор за уникатен проект каде што ќе бидат изведени познатите теми од култните цртани филмови од земјите од Источниот блок, кои го обележаа детството на генерациите од 70-те и 80-те години.

Во аранжмани на извонредниот Владимир Николов, а под диригентската палка на Џијан Емин, ќе бидат изведени темите од “Балтазар”, “Ну Погоди”, “Как Казаки”, “Козле Бозле”, “Густав”, “Балтазар”, “Мечето Ушко”…, и тоа проследени со специјална видео-проекција, како и со спектакуларен светлосен дизајн.

Вториот концерт ќе се одржи на 29-ти јуни и ќе биде насловен “Љубов и револуција”, повторно под диригентсво на Џијан Емин. Во негови аранжмани ќе бидат изведени едни од најпопуларните песни од сферата на поп-рок и панк музиката која претежно ги одбележа 90-те години. Заедно со оркестарот на Филхармонија, ќе настапи и хорот “ПроАрс” чиј диригент е Сашо Татарчевски, а кој ќе биде всушност главниот носител на проектот. Ќе бидат изведени песни на култните “Рејдиохед”, Ник Кејв, “Бисти Бојс”, “Продиџи”, “Нирвана”, Дејвид Боуви, “Секс Пистолс”, “Клеш”, Џими Хендрикс, “Пинк Флојд”, “Рамштајн”…

И овој концерт, како и првиот, претставува уникатна идеја во смисла на тоа ваков тип на композиции да бидат изведени од страна на симфониски оркестар и хор, што е ретка практика и во светот.

Повеќе на Музика24...