Вива Верди – Традиционален концерт за Василица 2013

Почнувајќи уште од 1995 година, Македонската опера и балет на љубителите на оперската уметност, им нуди можност да уживаат во едни од најубавите светски оперски арии, хорски делници и увертири. На 12.01.2013 (сабота) со почеток во 20 часот на големата сцена во МОБ ќе се изведе еден од најпознатите традиционални концерти кај нас, концертот по повод празникот Василица. Оваа година, концертот е посветен на големиот композитор татко на операта Џузепе Верди, по повод 200 години од неговото раѓање. Во негова чест на програмата ќе се најдат познати арии, дуети, хорски делници и увертири од неговите опери, од кои некои за прв пат се изведуваат во Македонија.

На концертот ќе настапат наши истакнати оперски уметници како: Славица Петровска-Галиќ, Весна Ѓиновска- Илкова, Благица Поп Томова, Ирена Кавкалевска, Катерина Стојановска, Иван Момиров (тенор од Бугарија), Цветан Стојановски,  Ѓорѓи Цуцковски, Борис Трајанов, Ристе Велков, Владимир Саздовски, Драган Ампов. Ќе се изведат арии од оперите: Магбет, Риголето, Дон Карло, Трубадур, Фалстаф, Симон Боканегра, Бал по маски, Набуко, Травијата. За прв пат во Македонија ќе се изведат ариите на Нанета од операта “Фалстаф” и аријата на Амелија од операта “Симоне Боканегра”. Диригент е Бисера Чадловска. Настапуваат хорот и оркестарот на МОБ.

Подготви: Виолета Трајкоска

Повеќе на Музика24...