Вчера вечер во Битола се оддржа првото издание на возобневениот фестивал на староградска музика „Ех, таа серенада“.
16 новокомпонирани серенади беа изведени во живо со придружба на оркестар и хор од солистите: Никола Зацески, Игор Илиевски, Раде Стаматов, Софија Кочовска, Христијан Тоневски, Катерина Таневска, Сефедин Бајрамов, Билјана Дамјановска – Јанчевска, Елена Георгиева, Мишко Крстевски, Перо Христов, Ламбе Алабакоски, Димитар Андоновски, Драган Мијалковски, Трио Џентлмен и Боеми.
Временските услови на неколку часа пред фестивалот беа причина да се промени локацијата но организаторот Културен и информативен центар – Битола експресно се прилагоди и успешно одговори на предизвикот и испорача перфектно музичко сценско доживување. Па и големата сала на Центарот за култура беше претесна да ги прими сите заинтересирани. Низ вечерта на водеше актерскиот двоец Васко Мавровски и Јулијана Мирчевска а Камерниот оркестар на Битола под диригентската палка на Владимир Димовски веќе е неизоставен дел од секоја музички приказна во градот.
Ризницата на најопеаниот град и градот на серенадите од вчера е побогата за 16 новокомпонирани нумери од истакнати автори како: Григор Копров, Борче Нечовски, Петар Георгиевски – Калица, Милан и Тодор Завкови, Огнен Неделковски, Орце Зафировски, Љупчо Трајковски – Фис, Давор Неќак, Николче Мицевски итн. кои со својата музика, аранжман и текст носталгично не вратија во времето но и ја возобновија традицијата и љубовта на битолчани кон староградската песна.
КИЦ Битола со својот тим покажаа дека на македонска музичка сцена и се потребни сериозни фестивали, нова продукција и професионални организатори.