Фестивали

Преполно Ракометно за Поп симфонијата на фестивалот „Балкан Гала“

Со Поп симфонија вчеравечер на Ракометното игралиште во Битола заврши второто издание на фестивалот „Балкан Гала“. Камерниот оркестар на Битола во придружба на осум истакнати вокали од земјава и регионот пред преполното Ракометно игралиште изведоа десетици поп нумери. Втората фестивалска вечер ја отвори битолчанецот Виктор Апостоловски со популарната „Супермен“ а по него своите најголеми хитови и светски познати песни изведуваа: Александра Јанева, Викторија Лоба, Ламбе Алабакоски, Ристо Самарџиев, Горан Каран, Гоца Тржан и Тони Цетински. Посебно емотивна беше изведбата на „Игри без граници“ на Тоше, од страна на Гоца Тржан која беше негова голема пријателка а која и овој пат со солзи во очите ја отпеаа нејзината омилена песна од Тоше.

Камерниот оркестар на Битола под диригентската палка на маестро Владимир Димовски, како и секогаш беше брилијантен во својата изведба која во комбинација со познатите вокали беше вистинско музичко-сценско уживање и спектакл.

После повеќе од два часа квалитетен поп репертоар вечерта заврши со дуетска изведба на даламтински и италијански нумери од страна на гостите од Хрватска, Горан Каран и Тони Цетински за потоа групно сите изведувачи да ја отпеаат „Битола, мој роден крај“

Уште еднаш се потври дека Камерниот оркестар на Битола заслужено ужива големо реноме и популарност а фестивалот „Балкан гала“ е уште еден во нивната низа успешни проекти. Со ова второ издание фестивалот веќе станува традиционален а со сигурност и еден од најпопуларните фестивали во градот.

Можеби ќе ве интересира: