Културо

Јануари – месец на анимирани филмови и тинејџерски драми во Кинотека на Македонија

Кинотеката на Македонија, по традиција, првите денови од Новата година им ги посветува на најмладите љубители на филмот и на тинејџерите. Тие од средината на јануари 2022 година ќе имаат можност да погледнат неколку интересни наслови.

За најмладите гледачи од 13-ти јануари 2022 година ќе се прикажат популарните анимирани филмови: “Биби, Боби и една снешкастична Нова година”, “Каламити Џејн”, и “Патешествието на принцот” на пладневните проекции во Кинотеката. Со Биби и Боби младите гледачи ќе можат да се дружат и во попладневните проекции.

Тинејџерите ќе имаат можност да видат неколку играни филмови од поновата продукција. Тоа се францускиот игран филм “Антоанета во севените” и италијанските наслови “Брат ми брка диносаруси” и “Стекленото момче”. За нив се резервирани вечерните проекции од 19 часот.

*Кратка содржина на филмовите, спомнати погоре:

“Биби, Боби и една снешкастична Нова година” (Волшебна новогодишна бајка со Биби и Боби)

Анимиран филм, Македонија 2021, 40 мин.

Режија: Никола Чикос, Гласови: Слаѓана Вујошевиќ, Сашко Коцев, Никола Ристановски, Сашка Димитровска

Весела новогодишна ноќ во домот на Биби. Биби, Зази, мама Ана и тато Тино се подготвуваат да ја китат елката, а на гости се дојдени и Боби и Зина. Некој прави колачиња, некој изведува магионичарски трикови, се пеат весели песнички и… никој не насетува какви волшепства, изненадувања и најнеобични пријателства ќе им донесе на Биби и Боби оваа „снешкастична“ Нова година. Јееј!

Влезница: 150 денари

“Каламити Џејн”

Анимиран филм, Франција 2020, 85 мин.

Режија: Реми Шаје, Сценарио: Реми Шаје, Фабрис де Костил

Анимираната комедија “Каламити Џејн” на Реми Шаје чиј оригинален наслов гласи “Каламити, детството на Марта Џејн Канари”, беше претставена во официјалната селекција на Канскиот филмски фестивал во 2020 година. Дејствието се случува во 1863 година во САД. Во конвој упатен кон Запад со надеж за подобар живот, таткото на Марта Џејн се повредува. Таа треба да го предводи семејниот караван и да се грижи за коњите. Токму тогаш започнува една опасна авантура полна со средби низ кои ќе дојде до израз храброста на Каламити Џејн.

Влезница: 100 денари

“Антоанета во севените”

Игран филм, Франција 2020, 97 мин.

Режија и сценарио: Каролин Вињал, Улоги: Лор Калами, Бенжамен Лаверн, Оливија Кот

Филмот на Вињал е инспириран од романот „Парување на Севените со магаре“ на шкотскиот писател Роберт Луис Стивенсон, кој творел кон крајот на 19 век. Антоанета со нетрпение со месеци го чека летото поради ветувањето за една недела одмор со нејзиниот љубовник Владимир. Но, кога тој го ќе го откаже одморот за да замине на Севените со жена му и со ќерка му, Антоанета не се мисли: и таа заминува по него! Кога ќе стигне таму, нема никого, освен магарето Патрик, кое ќе ѝ се придружи во текот на ова оригинална авантура…

Актерката Лор Калами ја освои националната француска награда „Цезар“ за најдобра глума, а филмот беше номиниран во десетина категории за оваа награда.

Влезница: 100 денари

“Брат ми брка диносаруси”

Игран филм, Италија 2019, 101 мин.

Режија: Стефано Ципани, Сценарио: Фабио Бонифачи Улоги: Алесандро Гасман, Изабела Рагоњезе, Роси де Палма

Џакомо отсекогаш сакал да има помал брат за да си игра со него, а од кога ќе се роди Џовани, неговите родители му велат дека неговиот брат е „специјално“ дете. Тогаш Џовани, се претвора во суперхерој со неверојатни моќи во фантазијата на неговиот голем брат, како оние во неговите стрипови.

Со текот на времето, Џакомо ја дознава вистината: неговиот брат има Даунов синдром, состојба која одлучува да ја чува во тајност. Кога оди во средно училиште и се вљубува во Аријана, тој го крие постоењето на Џовани од неа и неговите нови пријатели. Но, како можеш да очекуваш некој да те сака ако сокриеш толку важен дел од себе? За кратко време, вистината излегува на виделина и Џакомо сфаќа дека енергијата и виталноста на „специјалниот“ брат се заразни. Оригиналниот изглед на Џовани навистина го менува светот, исто како да е суперхерој.

Влезница: 100 денари

“Патешествието на принцот”

Анимиран филм, Луксембург/Франција 2017, 77 мин.

Режија: Жан-Франсоа Лагиони, Гзавие Пикар, Сценарио: Жан-Франсоа Лагиони, Аник Лереј

Лорен, стариот принц на мајмуните, се буди на непознат брег во земјата Ниокус, на кој се насукал по бродската несреќа. Таму го пронаоѓа дванаесетгодишниот Том, чии што родители ќе му пружат засолниште. Родителите на Том се научници во егзил: биле протерани од нивната поранешна заедница бидејќи верувале дека постојат и други мајмунски цивилизации. Принцот најпрвин ќе биде подложен на научни испитувања, а потоа во придружба на Том ќе шета низ главниот град и блиската џунгла, каде што открива непознат и волшебен свет. Но, Принцот ќе ги запознае и ригидните правила кои важат во тој необичен свет за него…

“Патешествието на принцот” е ново долгометражно остварување на водечките француски аниматори Жан-Франсоа Лагиони и Гзавие Пикар, кои користат ликови од фантазијата за да раскажат приказна за предизвиците на светот во кој живееме. “Патешествието на принцот” беше конкурент за награда на Европскиот фестивал на фантастичниот филм во Стразбур, Франција (Strasbourg European Fantastic Film Festival), како и на други фестивали за анимирани филмови.

Влезница: 100 денари

Стекленото момче”

Игран филм, Италија/ Австрија/ Швајцарија 2020, 90 мин.

Режија: Самуеле Роси, Сценарио: Романдо Кола, Јозела Порто, Самуеле Роси,

Улоги: Андреа Ару, Лорета Гоџи, Роза Барболини

Пино Гамбаси е болно дете што страда од хемофилија и гори од нескротлива желба за слободна и бескрајна храброст. Заради болеста е наречено „стаклено момче“. Сепак, Пино решава да ја почне својата авантура во светот и да им покаже на сите дека може да живее како и секое друго дете.

“Стекленото момче” е инспириран од истоимената книга на италијанскиот автор Фабрицио Силеи, добитник на Андерсоновата награда. Приказната допира важна тема, а тоа е потребата на децата да го надминат стравот од живеењето со болест, во овој случај, хемофилијата.

Влезница: 100 денари

Можеби ќе ве интересира: