Сузана Јовчева ја промовираше новата песна “Македонија” (Видео)

Инспирација за новата песна на Сузана Јовчева е љубовта кон татковината, кон македонците што живеат насекаде низ светот и коишто со љубов ја сакаат својата родна земја Македонија.

Текстот и музиката за песната ги напиша Сузана Јовчева, а аранжманот е заеднички на сите артисти коишто учествуваа во реализацијата на оваа песна. За снимањето и продукцијата се погрижија Сузана Јовчева, Ангел Ќосев и Александар Стефановски, а истата е снимена во студијата “Подрумот” и “Alex Home Studio” во Скопје. Сузана Јовчева, песната “Македонија” ја исполнува заедно со едни од нашите најдобри музички артисти како што се: Гоце Димовски, Гоце Узунски, Марјан Јовановски, Горан Гешовски, Ангел Ќосев, Илија Филиповски, Александар Стефановски и Перо Стефановски. Дел од артистите коишто учествуваа во снимањето се членови и соработници на култната музичка група Synthesis со којашто и самата соработува долги години наназад.

Емотивната експресија на моќната вокална интерпретација на Сузана Јовчева поврзана со силната ритмичка структура, хармонија и инструментална изведба на артистите коишто учествуваа во снимањето на оваа песна веруваме дека ќе ги освои срцата на сите љубители на убавата македонска песна и добриот звук.

Инаку, Сузана Јовчева е професор по музичка култура и има настапувано на речиси сите релевантни музички фестивали во Македонија како што се “Фолк фест Валандово”, “Цветници”, “Макфест”, македонски избор за песна за Евросонг и други, добитник е на бројни музички признанија и награди, а многу пати има настапувано низ светот како соло артист и како соработник на групата Synthesis со којашто група неодамна беше на турнеја во Австралија.

Во прилог песната “Македонија” на Сузана Јовчева. Уживајте!

Повеќе на Музика24...