Како што дознава музичкиот портал Музика24, по повод 50 години од издавање на албумот “Дневникот на една љубов”, кој патем за прв пат овој нејзин прв албум е издаден кон крајот на февруари 1973 година, Јосипа Лисац годинава одржува низа на концерти низ поголемите балкански градови.
Во Скопје со голем концерт доаѓа на 3-ти ноември кога Авалон продукција како нејзини домаќини ќе ни подготват еден совршен и емотивен концерт од оваа мега популарна ѕвезда на балканско и регионално ниво.
Држејќи се до принципот дека никогаш не смее да и стане здодевна на публиката, и со гласот и со стасот, Лисац му внесува свежина во „толкувањето“ на нејзиниот култен албум, изведувајќи ги песните во џез-аранжмани.
Концертот на Јосипа Лисац закажан во Скопје веќе уште од сега ги подгрева емоциите кај слушателите. Самиот концерт е форматиран како посвета на нејзиниот најзначаен албум во кариерата, „Дневник на една љубов“ (Dnevnik jedne ljubavi), кој пред 50 години постави „златни“ стандарди во хрватската и ексјугословенската поп-музика.
Таа е родена на 14 февруари 1950 во Загреб. На почетокот на нејзината кариера била членка на групата „Златни Акорди“, вистински расадник на пејачи и музичари. Десетте нумери од нејзиниот прв солистички албум, споменатиот „Дневник на една љубов“, веднаш станаа еталон за поп-музика кај критиката. Со силниот глас и автентичниот моден стил, кои сè уште немаат вистински пандан на регионалната музичка сцена, Јосипа Лисац го испиша сопствениот портрет во едно подобро минато кое, и вака „подгреано“, повторно ги распродава нејзините концерти.
Турнејата „50 години од Дневникот на една љубов“ започна со концертот во август во Пула, и Лисац до крајот на ноември ќе настапи, буквално, од Македонија до Словенија.