Таа на само 17 години победи на овогодинешното издание на фестивалот за забавна музика во Штип “Макфест” со песната “После него”. Млада е, убава, борбена и пред се успешна. Сања Маркоска, таа вели дека уште од мала го сакала Дедо Мраз, а најмногу од се за Нова година сака чоколади. Како се чувствува, каде ќе ја прослави и со кого Новата 2013-та, прочитајте во продолжение…
Музика24: Како се чувствуваш секогаш кога се наближува Новата година, дали можеби како некое мало дете оставаш празни новогодишни чорапчиња и го чекаш својот подарок од Дедо Мраз, дали можеби размислуваш и потајно си фантазираш… дали можеби се чувствуваш некако посебно, новогодишно… или ти е сеедно што се наближува Нова година?
Сара: Секогаш сум многу возбудена пред Нова година и многу ја сакам предновогодишната атмосфера. Уште од малечка верувам во Дедо Мраз, бидејќи секогаш под елката наоѓав пакетче и подарок што сум го посакувала. Оваа година, Дедо Мраз сакам да ми подари ќеса полна чоколади и многу здравје, љубов и среќа.
Музика24: Како вообичаено се подготвуваш за Новата година? Купуваш многу храна, некоја посебно убава книга, купуваш подароци за своите најблиски… си купуваш нешто за себе?
Сара: Купувам лампиони и сијалички за да си ја накитам елката и воопшто целиот дом. Купувам храна, особено чоколади што мора да ги има за Нова година и секако купувам мали подароци за да им оддадам важност на моите најблиски.
Музика24: Што претставува за тебе новогодишната еуфорија? Што претставува воопшто пречекот за Нова година, како го доживуваш сето тоа? Дали тоа и тебе ти се случува, дали те фаќа она новогодишното?
Сара: Секоја Нова година, ме фаќа она новогодишното. За мене, Новата година претставува нов почеток. Веќе неколку години по ред славам со друштво, па така и оваа година ќе има многу забава. Кога ќе помислам на Нова година, освен на Дедо Мраз и забава, помислувам и на честитањето после 00 часот, кога не можеш да пратиш порака или да се слушнеш со најблиските поради тоа што сите мрежи се зафатени хахаха (се смее).
Музика24: Како и каде планираш да ја дочекаш новата 2013-та година?
Сара: Со друштво во Маврово, најверојатно во Ратрак.
Музика24: Кој е според тебе настанот на музички план кој што ја одбележи 2012-та, а која пак песна може слободно да кажеме дека е песна на годината?
Сара: Зборувам во мое име, за она што мене ми остави најголем впечаток: Настан којшто ја обележи 2012-та е “Макфест”, со песната “После него”.
Музика24: Кои се твоите планови, замисли… кои што би сакала да ти се остварат во текот на идната Нова година, нешто што досега не ти се случило?
Сара: Сакам да го снимам првиот спот, сакам да отидам за прв пат да ја посетам сестра ми во Лондон, сакам да бидам уште поуспешна од оваа година и секако сакам убаво да ми тргне годинава, станувам полнолетна.
Музика24: Што би им посакала во новата 2013-та година на нашите Музика24 интернет читатели, а воедно и на твоите фанови и обожаватели?
Сара: Да си поминат најубаво за Новогодишната ноќ! Да им се исполнат сите замислени желби, да бидат здрави, среќни и заљубени во Новата 2013-та година! Поздрав.
Интервјуто го подготви: Александра Блажевска