Легендарната кралица на соул музиката Арета Френклин ќе замине во пензија, но не пред да го објави својот последен албум во плодната петдецениска кариера. Имено, 42-ри по ред студиски албум на 74-годишната дива ќе стигне во септември, а дел од песните ќе ги продуцира нејзиниот исто толку легендарен колега Стиви Вондер.
“Едвај чекам да влезам во студио”, рече пејачката во разговор со една американска телевизија додавајќи дека е и повеќе од задоволна од својата кариера, но време е да се пензионира бидејќи сака да помине повеќе време со своите внуци пред да заминат на колеџ. Претстојното издание ќе содржи сосема нови, оригинални песни, а ќе го наследи “Aretha Franklin Sings the Great Diva Classics” од 2014-та, каде што се сместени 10 преработки на познати хитови од нејзините колешки, како што се Адел, Барбра Страјсенд, Глорија Гејнор, Ета Џејмс, Алиша Киз и други.
Подготви: Андреја Андреевиќ