Ретко што укажува на празничната сезона повеќе од божиќниот хит на Мараја Кери, „All I Want for Christmas Is You“. Песната стана синоним за божиќните празници и тешко е да отидете некаде во овој период од годината без да ја слушнете.
За Кери, оваа песна е подарок кој не престанува да се дава. „Billboard“ проценува дека пејачката минатата година заработила 1,86 милиони долари од песната, додека според студијата на „The Economist“ од 2016 година, Кери заработува во просек 2,5 милиони долари секоја година. Песната, објавена во 1994 година, би можела да надмине 100 милиони долари во вкупна заработка во 2023 година, според извештајот на „Associated Press“.
„All I Want for Christmas Is You“ достигна една милијарда стримови на „Spotify“ во декември 2021 година и беше број 1 на „Hot 100“ на „Billboard“ во последните 4 години по ред. Кери со текот на годините заработи милиони долари благодарение на нејзината успешна музичка кариера, турнеи и спонзори, а пејачката има проценета нето вредност од 350 милиони долари, според „Celebrity Net Worth“.
Песната постави три Гинисови рекорди во 2019 година, вклучувајќи го и рекордот за најстримувана песна на „Spotify“ за 24 часа. За еден ден во декември 2018 година, таа беше стримувана повеќе од 10,8 милиони пати, а повторно го собори рекордот во 2022 година со 21,3 милиони стримови.